VENEZUELA, CARACAS (AFP).- E presidente di Venezuela, Nicolás Maduro, a enkabesá na Caracas un marcha di studiantenan konvoká pa su partido, un dia despues di a nombra e ekipo di kampaña ku lo buska su reelekshon dia 28 di yüli benidero.
Míles di hende a kana den rechaso di e sanshonnan di Merka kontra e pais karibense, meimei di preguntanan riba e kondishonnan dje elekshon presidensial.
Fuertemente kustodiá, Maduro a uni su mes na e manifestashon na e sede di vise presidensia i a kana algun kuadro te yega na e palasio presidensial di Miraflores.
“Mi gusta marcha”, segun e mandatario a bisa den un transmishon via di televishon. “Marchanan ta un fiesta, e ta algu di pashon i patriotismo, pa e motibu ei e pueblo bolivariano ta marcha, pa e motibu ei e speransa ta den e kaya aki”, el a bisa.
Maduro ta aspirá un di tres mandato ku lo permiti’é keda 18 aña na poder. Djaweps último el a nombra su ekipo di kampaña, enkabesá pa Jorge Rodriguez, e hefe di Parlamento ku ya tin e funshon ei pa seis aña.
E kampaña, sinembargo, a kuminsá algun luna pasá ora ku Maduro a kuminsá biaha pa e pais i hasi aparishonnan públiko ku pa añanan tabata un eksepshon.
Washington aña pasá a fleksibilisá un embargo kontra di krudo, gas i oro di Venezuela, despues ku e delegadonan di gobièrnu di Maduro i oposishon a akordá un ruta pa yega na elekshonnan presidensial.
Pero, despues di ratifikashon dje sanshon kontra di Machado, kende a bari den preelekshon di oposishon, i e veto na su sustituto Corina Yoris, gobièrnu norteamerikano a disidí pa no ekstendé un lisensia ku ta outorisá operashonnan ku e estatal petrolero PDVSA, ku a vense 18 di aprel.
