MADURO TA SUBI SALARIO MINIMO KU 40%

CARACAS, AP.- Presidente Nicolas Maduro a aprobá ayera un oumento di 40% di salarionan minimo pa tur trahadó, e di 4 oumento den loke ta bai e aña aki mei mei di un gòlpi di inflashon di tres sifra. Durante un akto di entrega di bibienda, e mandatario a bisa ku for di 1 di novèmber proksimo lo tuma lugá e oumento di salario di 27092 bolívar ku ta 41,14 dòler i un oumento di bono di alimentashon ku lo pone su ingreso global minimá na 90212 bolívar ku ta 137 dòler.
Maduro a indiká tambe ku lo tin un oumento di tur salario di trahadónan públiko i militar ku 20% for di novèmber.
Venezuela ta enfrentá un krísis ekonómiko kompliká dominá pa inflashon i problemanan masha serio di eskases di kuminda, remedi i otro produktonan básiko miéntras ku trahadónan ta keha di preisnan ta subi ku hopi rapides mas ku salarionan.
E fondo monetario internashonal ta kalkulá ku inflashon venezolano por yega e aña aki na 720% miéntras ku ekonomistanan lokal ta kalkulá ku aña pasa el a sera ku 270.7%. Gobièrnu pa hopi aña kaba no ta entrega sifranan.
Maduro a aprobá na febrüari un promé oumento di salario di 20%, na aprel el a akordá un di dos di 30% i despues na sèptèmber ku 50% i awor esun na novèmber di 40%.