ORANJESTAD.-Djaluna anochi pa mas o ménos 11:58 sentral di polis a haña notifikashon ku un señora a keda atraká i hinka na altura di Paradise Beach Villas. A manda un patruya na e sitio i tambe ambulans.  E promé patruya ku a yega na e sitio a topa ku e víktima kende a deklará ku e tabata train(kore) i na dado momento un hòmber lo a aserk’é i atrak’é. El a purba bringa ku e atrakadó,pero e malechor a hink’e. E sospechoso tabata bisti kompletu na pretu. El a kore bai den direkshon nort i probablemente a hui den un outo kolo shinishi.

E atrakadó a logra bai ku selular di e víktima. Ambulans a yega na e sitio i a duna e víktima asistensia médiko pa despues a transporte pa hospital. Atrako Team a presentá na e sitio huntu ku polis tékniko pa hasi investigashon. Departamento di slachtofferhulp tambe a presentá pa asistí e víktima.

Kuerpo Polisial di Aruba ta hasi un apelashon na kualke hende ku por sa algu di e kaso aki pa nan tuma kontakto via  e linja 11141.