WILLEMSTAD.- Art of Nature Caribbean Foundation ta embarká riba produkshon di e One Woman Show "Mama na unda mi tin doló?!" komo rekoudashon di fondo pa inisiá un programa di interkambio pa duna hóben ku a drop-out un oportunidat nobo i pa spièrta forsa di empatia i kolaborashon mutuo den komunidat di nos islanan.

Kontenido
Un obra outobiográfiko ku temanan kontroversial tres'é pa 7 diferente personahe di diferente kultura: ulandes oropeo, latino, ingles karibeño, surinameño, arubiano i kurasoleño.
E komedia ta un komedia (limpi) ku embeyesimentu musikal di Konkie Halmeyer i Randel Rosalia. E outor i presentadó ta Caresse Isings, dirigí pa Rina Penso. Presentashon lo ta den idioma Papiamentu, Ulandes, Spañó, Ingles Karibeño i Sranang.
E obra lo tin durashon di 1 ora i 15 minüt, sin pousa i ta keda presentá dia 18 di mei próksimo den Sala di Rekreo ABVO na Brievengat.
Caresse Isings a drama inspirashon pa format di e obra aki for di ehèmpel ku el a risibí di su mama Nydia Ecury. E ta konsiderá ku komunikashon entre hende den komunidatnan rònt mundu, inkluyendo komunidatnan chikitu di nos islanan, ta den un spiral di deterioro i ku ta tempu pa motivá un kambio konstruktivo den esaki.
E título di e obra "Mama na unda mi tin doló?!" ta ilustrá kon tur hende ta kana piki tur sorto di doló aki aya durante e proseso di nan Bida i ku hopi biaha nos nò ta ni konsiente di e echo ku sierto komportashon repetitivo ku nos ta ekshibí, por wèl di ta basá riba heridanan emoshonal ku meresé atenshon i kurashon. Kada unu di e shete personahenan sumamente kolorido i original ku Caresse a krea p'e interpretá den un ambiente multikultural ku ta tipifiká dinamismo di nos komunidat, ta desplegá nan propio dolónan personal den aserkashon humorístiko-kontroversial, atraves di vários tópiko ku Isings ta konsiderá digno di atenshon: "E situashon prekario dje poblashon -original- di Boneiru meresé nos empatia i atenshon serio pa trese kambio. Ta manera bo ta pará na kantu ta mira bo ruman ta hoga den laman i bo n' ta ni gaña bula na awa pa purba salb'é! Dia ta pasa i kada biaha bo ta mira kon ta bolbe buta djònki dùimskruf riba e boneriano, kaminda masha ten n' tin ni dùim te pa por sigui buta skruf!"
E presentashon ta tuma lugá dia 18 di mei benidero, 8'or di anochi den sala di rekreo di ABVO na Brievengat. Caresse a indiká ku pa e fecha aki el a pensa ku lo ta un bunita opsekio pa regalá mamai riba 13 di mei, dia di Mama pa por kompañ'é pa dia 18 e bin sintié inspirá, hari su barika yen i sigui inspirá tur hende pa ta mas envolví i mas kariñoso ku otro!