MERKA.- E banda mehikano di latin rock, Maná lo risibí dia 26 di aprel próksimo, durante di entrega di galardon di Latin Billboard, un premio pa nan trayektoria artístiko i rekonosementu pa nan karera maravioso, asina organisadónan di e premio Latin Billboard a informá.
Billboard i e kadena di televishon, Telemundo ta esnan ku ta hasi entrega di e premio aki ta konsiderá ku e influensia di Maná a marka e desaroyo di músika latino na Mundo. Otro artistanan ku den pasado a risibí e galardon aki ta Carlos Santana, Emmanuel, José José i Marco Antonio Solis.
“Maná a definí rock latino durante tres dékada, paden i pafó di nos listanan”, asina Leila Cobo, direktor ehekutivo di kontenido i programashon latino di e revista Billboard a indiká.
Dies di su temanan, manera e éksitonan ‘Labios compartidos’ i ‘Lluvia al corazon’, a yega di liderá e lista di ‘Hot Latin Songs’ di Billboard i 32 mas a logra drenta e lista.
E banda a logra di reuní 24 galardon di Latin Billboard den su trayektoria musikal di mas ku 30 aña i e aña aki nan ta finalista den e kategoria di ‘Artista Latino Pop di aña, duo o grupo’.
Maná, lo aktua durante dje entrega di galardon dia 26 di aprel próksimo na Las Vegas.