Manera Chris a bisa ‘Mester bisa e kosnan stret’

WILLEMSTAD.- Pa ‘DEN E BEMBE’ e diálogo ‘Bibando Sessions’ di ayera tardi no tabata na e momentu oportuno, paso e no a trese klaridat pa farándula. E loke por dedusí for di e diálogo ta ku tur kos ta keda meskos.

E inisiativa ta bon, nos no ta diskutí riba esaki, pero mirando e situashon ku nos ta den aworakí kaminda tin 4.768 kaso aktivo, 176 kaso positivo ayera ku 129 hende hospitalisá, e diálogo no a tuma lugá na e momentu oportuno.

Nos ta den un krísis i pa bai kombersá riba farándula, no tabata e momentu oportuno tumando na konsiderashon ku ta buskando tur manera pa hendenan bai vakuná i ku ta trahando ku alma i kurpa pa por yuda esnan ku a keda infektá pa nan wòrdu saná.

E plannan ku tin poné riba papel kaba, e ideanan ku a bin dilanti ayera, tur ta bon, pero nos por dialogá i debatí riba nan na momentu ku tin un lus na final dje tùnel.

Aworakí nos mester enfoká nos mes pa baha e kantidat di kontagio na un nivel ku esaki por keda manehá na manera responsabel, promé nos kuminsá plania fecha.

‘Mester bisa e kosnan stret’, manera Chris Strick a bisa ayera nochi durante dje diálogo, no mester primintí ku ta bai habri farándula si esaki no ta posibel. No duna fecha, paso e situashon pa nos ta sinsero ta kritiko manera Dr. Izzy Gerstenbluth ta bisa durante di tur rueda di prensa di Gobièrnu.

‘DEN E BEMBE’ ta pro pa por analisá kada proposishon ku tin riba mesa, te asta e konseptonan di Hulanda, pero mester warda trankil pa e momentu oportuno pa trese farándula bèk riba mesa di diskushon.

Den e invitadonan nos a sinta falta di AMAK i òf nan Komishon na Interes di Farándula, komo un organisashon ku ta representá músikonan i ku ta rekonosé pa Gobièrnu di Kòrsou.

Ban spera ku pronto, aki 1 pa 2 luna, e situashon lo por ta di tal manera ku gruponan di interes lo por kuminsá sinta ku Gobièrnu i tur e entidatnan di Gobièrnu ku ta otorgá pèrmit na mesa pa yega na konsepto di eventonan ku lo ser permití pa tuma lugá.