TIFLIS (AFP).- Míles di persona a protestá ayera na Georgia despues ku Parlamento a aprobá un lei kontroversial di “influensia estranhero”, un norma pa kua Union Europeo a atvertí Georgia ku esaki por stroba su aspirashon pa drenta e bloke europeo.
Legisladornan a aprobá ku 84 voto kontra 30 pa aseptashon dje lei. Durante dje reunion tabatin pleitamentu serio entre parlamentarionan ofisialista di “Soño Georgiano” i e oposishon. Pafó dje edifisio, a manifestantenan a sigui ku nan protesta ku ya ta bai un luna. Esnan ku ta kritiká e lei ta bisa ku e ta similar na un lei na Rusia, ku nan ta usa pa sera boka di oposishon.
Alrededor di 2.000 manifestante, den su mayoria hóbennan, a reuní pafó di Parlamento i a kanta lemanan manera “Bisa nò na e lei ruso”.
Ministerio di Interior a informá ku 13 manifestante a keda detené pa motibu di no a sigui òrdu di polis.
Union europeo a atvertí ku e lei aki no ta kompatibel ku e aspirashonnan di Georgia pa drenta e bloke di 27 i promé ku e votashon un bosero europeo a asentuá ku e punto aki ta un opstákulo.
