WILLEMSTAD.- E formashon musikal Mara y Los 9 Del Barrio ta lansa single nobo riba merkado “Tata Danki” mañan, 19  desèmber 2017.
E single aki ta unu kaminda Mara ta yama danki na Dios. Skuchando un piesa afrikano Mara a haña e inspirashon pa skirbi pa yama danki na nos Ser Supremo pa tur loke a pasa i a keda sin pasa den e aña ku ta yegando su fin aki.
No a dura muchu largu ora Mara a drenta den kontakto ku Michelangelo “Amadu” Catal pa e single kuminsá kue forma. Michelangelo a drenta studio i kuminsá graba i asina den ménos ku dos luna “Tata Danki” a bira realidat.
Mara ta bisa ku esaki ta un ‘uitstapje’ den muzik afrikano, ku ta un muzik ku Mara ta atmirá masha hopi mes. Pero ku su tumbao tei ketu bai i ku ainda e ta trahando duru den studio riba su proyekto internashonal kual ta konsistí di ritmonan Latino i ta na idioma spañó.
Aña pasá el a lansa su promé single ku título YDK, yu di Kòrsou. Un tremendo salsa kaminda e ta broma nos dushi Kòrsou i kon orguyoso e ta, di ta un yu di Kòrsou.
Pa “Tata Danki” bira realidat, Mara tabata tin e plaser di graba den e studio di Reno Martis kaminda semper tin un ambiente masha ameno, ku bo ta sinti bu den famia. “Mi tabatin e gran honor di graba ku Kweku Mensah, un kitarista renombrá di Ghana” Mara ta bisa. “Un hende masha humilde i ku masha grasia”.  Tambe manera semper den su banda su kasá Noibe Girigorie ku a toka bas i kanta koro pe. I e sorpresa di e single ta ku Mara i Noibe su yu menor di 9 aña Myeesha, tambe a kanta koro huntu ku Papa i Mama. Enkargá di e mixing i mastering tabata Chelo Ignacio ku a sa manera semper di hasi un tremendo trabou. ‘Last but not least’, Mara kier yama un danki speshal na Michelangelo “Amadu” Catal, ku a hinka asina tantu tempu, dedikashon i inspirashon pa produsí e single aki. Kaminda Amadu ta, niun hende no por drumi.
E Afro-pop single “Tata Danki” lo wòrdu estrená na radionan lokal i tambe riba e página di facebook: https://www.facebook.com/MARAyL9DB/
Bishita e página di Facebook, like i share e página i den bo inbox bo ta risibí e single “Tata Danki” grátis.