MERKA.- E kantante Marc Anthony a firma un kontrakt di mas ku 160 mion dòler pa su próksimo ‘gira’ di konsierto na Merka, Latino Amérika i Karibe ku e empresa di konsierto i eventonan deportivo, CMN, asina a keda informá ayera.
E akuerdo ta esun di mas haltu den historia pa un artista latino i ta konfirmá ku ‘Cardenas Marketing Network’ ta e promotor eksklusivo di e konsiertonan di e kantante di ‘Valio la Pena’, esaki segun un komunikado di e artista huntu ku CMN, presidí pa e kolombiano, Henry Cardenas.
Pa e merkado Europeo e gira lo keda ko-produsí pa ‘Magnus Talent Agency’, fundá pa Marc Anthony i CMN.
E komunikado a indiká ku Marc Anthony ta krea un presedente nobo den e área di konsierto na momentu ku e akuerdo ta bira e kompensashon mas haltu pa un gira internashonal pa kualke artista di músika latino i un dje akuerdonan mas lukrativo pa un artista den kualke género di músika.
Konsiertonan di Marc Anthony na diferente okashon a keda inkluí riba e lista di konsiertonan mas takiyero.