WILLEMSTAD.- Djadumingu benidero Marcha di Seú di Bándabou lo ranka sali yen di koló i muzik di Seú den direkshon di pariba. Un kantidat grandi de Grupo di Seú lo wapa for di Hòfi Abou te fèlt di Barber. E marcha lo sali eksaktamente 1’or di mèrdia, miéntras ku ta planiá pa e último grupo yega final pa mas o ménos 6’or di atardi.
Fundashon Seú ta ferwagt ku e aña aki atrobe, un kantidat hopi grandi di públiko lo animá e Gruponan banda di kaminda. Pues, echo ta ku e último añanan e kantidat di hende di Pariba ku ta bai gosa di Seú di Bándabou, a bin ta krese gradualmente.
Den e kuadro aki, Fundashon Seú ta invitá pueblo di Kòrsou en general pa tumba pa Bándabou djadumingu 7 di mei benidero, pa asina apoyá ku nan presensia spesialmente nos hóbennan ku definitivamente a hasi Seú di nan.