WILLEMSTAD.- Marcha Hubenil 2018 ku solamente 13 grupo a resultá un masha kolorido. Dunando honor na título dje tumba hubenil ganadó, ‘E Bichi Kolorido’, e marcha hubenil tabata bunita. Loke si a resaltá ta e echo ku diferente grupo a skohe e tema ‘Payaso’ òf algu relashoná ku esaki. Un biaha mas dos punto ta bin dilanti, e echo ku sea AGKK òf e organisashon enkargá ku organisashon di Karnaval mester por tin un bista riba loke gruponan ta bai presentá, anto esaki for di den luna di sèptèmber dje aña promé pa dje forma ei evitá loke a sosodé e aña aki. E otro ta loke nos a opservá ku tur aña ta sosodé. Ta ‘stress’ pa e muchanan para den rei tras di otro i no ta duna e muchanan chèns pa baila ni ta krea un koreografia. Ta un plaser pa bo mira Isla Hubenil ku si ta laga e muchanan baila liber i nan tin un koreografia ku e muchanan ta baila. Laga e muchanan disfrutá durante dje marcha. Riba fotonan ku ta kompañá e artíkulo bo ta haña un bista dje presentashon di tur e gruponan ku a partisipá na Marcha Hubenil 2018.