CARACAS, AP.- Ritmo di pitu i desena di míles di opositor bisti ku kamisa blanku, subiendo nan bòrchinan na laira, a Sali den kayanan di Caracas pa protagonisá un dia nobo di protesta kontra gobièrnu. Esaki ta bira e segundo luna di protesta.
“Nos ta dispuesto na keda protesta pa un luna mas i hasi loke ta nesesario paso Venezuela mester pa nos keda riba kaya pa e Gobièrnu aki komprondé ku e mester bai”, asina Sergio Hernandez, un tékniko informátika, di 47 aña, a bisa miéntras e tabata kana huntu ku su kasa dor di e avenida kapitalino aki.
Míles di opositor mas, ku tabata purbando di marcha dor di algun avenida na wèst, a wòrdu blòkia miéntras sentenar di guardia tabata lansa gas lakrimógeno pa evitá ku nan ta avansá pa sentro di e siudat kaminda e mobilisashon ofisialisá tabata desaroyando.
Un di e manifestantenan, diputado opositor Jose Manuel Olivares, a sufri un herida na su kabes despues di a wòrdu gòlpia pa bòm lakrimógeno.
E Gobièrnu i oposishon a bolbe midi forsa den e marko di Dia Internashonal di Trabou, ku marchanan den e kapital i otro siudatnan di e pais, meimei di un klima di tenshon polítiko haltu i violensia kresiente ku a generá preokupashon den e komunidat internashonal, kual ta boga pa salida di e krísis. E protestanan, for di final di mart, a laga un saldo di 29 morto i masha hopi herido.
