MERKA.- Algu mas ku 1 aña pasá Mariah Carey a kita un renchi di kompromiso ku su amante dje tempu ei, James Packer a regal’é.
E renchi di djamanta, ku un djamanta di 35 kilate tabata e renchi di kompromiso pa un matrimonio entre nan dos, pero manera e relashon a kibra e diva a warda esaki.
For dje tempu ei a kuminsá spekulá si e kantante lo a bai debolbé e renchi na su eks. Awor a bira konosí ku Carey a bende e renchi anto pa un montante muchu ménos ku e balor stima di 10 mion dòler.
Segun informashon e kantante a keda ku e renchi komo parti di un akuerdo finansiero entre e i Packer.
‘Mariah a ekspresá abiertamente su desishon di sigui pa dilanti ku su bida rondoná pa positivismo. Esei ta rekerí pa bo laga atras tur kos emoshonal i material, inkluyendo un renchi bieu di kompromiso di un eks frei’, asina e relashonista públiko dje artista a deklará.