MERKA.- Mariah Carey lo risibí e ‘Icon Award’ durante dje siguiente edishon di ‘Billboard Music Awards’. E kantante lo keda pone den spòtlait pa su eksitoso karera musikal.
‘Mariah Carey ta un berdadero Ikono. For di su debut na 1990 ela bin ta kibra rekort tras di rekort. Den tres dékada ela sa di dominá e listanan di éksito’, asina a keda publiká riba e website di Billboard.
Carey lo risibí e galardon durante dje evento di BMA ku lo tuma lugá dia 1 di mei próksimo. E kantante ta pone pa hasi un presentashon tambe durante dje evento.
Ku tur probabilidat lo e presentá un ‘medley’ di su éksitonan di mas grandi.
Carey ta konosí sigur pa e éksitonan: ‘Hero’, ‘Without You’ i e klásiko di Pasku ‘All I want for Christmas is You’. Su mas resiente albùm ‘Caution’ a subi merkado aña pasa.