MERKA.- E famoso kantante na 2001 pa promé biaha a keda diagnostiká ku e trastorno ‘bipolar’ despues ku el a sufri un kolapso físiko i mental. E diagnóstiko el a mantené den silensio pa hopi aña.
Awor, Mariah Carey, un dje artistanan mas eksitoso i ku mas di 200 mion di disko bendí, a disidí di papia pa promé biaha riba su bataya kontra dje enfermedat i a revelá na e revista People e detayenan dje lucha.
‘Te ku poko tempu pasa mi tabata ninga i tabata biba e temor konstante ku un hende lo a divulgá mi malesa. E tabata un karga muchu pisá pa mi biba kuné i simplemente mi no por a sigui hasi esaki. Ma buska i risibí tratamentu, ma konektá mi mes ku hendenan positivo i a bolbe hasi loke mi gusta, komponé kansionnan i hasi muzik’, asina e kantante a bisa durante di e entrevista ku People.
Durante hopi tempu e kantante a pensa ku e tabata padesé di un trastorno di soño grave, paso e tabata pasa anochi trahando, e tabata sinti su mes iritá i tabatin e miedu konstante di desepshoná hende.
E kantante awó ta den terapia i ta tuma medikamentu pa e trastorno ‘bipolar II’, ku ta inkluí periodo di depreshon i hipomania, e ta ménos grave ku e ‘bipolar I’, ounke ku e por kousa iritashon, insomnio i hiper aktividat.
‘Mi ta tumando remedi ku ta parse di ta basta bon. Mi no ta sinti mi demasiado kansá o slou. Enkontrá mi ekilibrio adekuá ta e kos di mas importante’, asina e kantante a ekspresá.
Carey, kende a nase na New York di un mama irlandes i un tata venezolano afroamerikano, a komentá ku el a disidí di papia di su enfermedat na e momentu aki paso e ta den un etapa den su bida ku e ta sintié kómodo pa hasi esaki i paso e tin e speransa ku lo stòp di stigmatisá personanan ku ta sufri di e trastorno.