WILLEMSTAD.- Kuminsando djadumingu awor mainta tempran Kòrsou lo ta den gara kompletu di ‘Velas Latinoamerica Curaçao 2018’, e evento di bela mas grandi di Latino Amérika ku partisipashon di barkunan di bela di armada di 8 pais huntu ku Marina ulandes.
Curaçao Sail Foundation a hinka un tremendo programa den otro kaminda públiko por bishitá e barkunan, eksperensiá i risibí informashon di trabounan di Marina ulandes, presensiá sekshon di demostrashon den haf di Kòrsou i tres dia di konsierto riba Plasa Brion.

Spesial pa e evento aki Marina ulandes a duna un koperashon masha grandi mes na e evento. Un di e presentashonnan ku sigur ta algu pa bai wak ta e presentashon di Marinierskapel huntu ku Izaline Calister.
E konsierto aki ta tuma lugá djaluna awor, 16 di yüli riba Plasa Brion. Ayera tardi e miembronan di e orkesta di Marinierskapel a kuminsá yega Kòrsou abordo di e barku di Marina ulandes, Pelikaan.
Nan ta super entusiasmá ku nan presentashon i a primintí di brinda un espektákulo tur afó ku Izaline Calister.