KRALENDIJK – Urbano St. Jago, alias Spòti, no t’ei mas. El a fayesé e siman aki. Spòti tabata un figura markante, parti di Rincon, parti di Boneiru, huntu ku su ruman Richard (Chati).

Spòti a nase dia 2 di aprel 1938 na Boneiru. El a nase i lanta na Rincon, pero a biba despues na Aruba ku su ruman mas grandi i mama Florita, manera el a bisa den e programa Herensia. Nan a biba den e bario Madiki.

Na Aruba Urbano a kue djòp na vários lugá. Segun el a bisa den Herensia, te asta na un kas di hende grandi el a traha, koriendo hende grandi den ròlstul.

“Mi tata tabata Colá Mercera i mi mama Florita Sint Jago. Nan no tabata kasá ku otro. Despues mi mama a kasa ku Emiliano Cicilia di Nikiboko”, Urbano a bisa.

Urbano: “Aruba tabata dushi. Mi a bini Boneiru pa biba, pero despues a bolbe Aruba. Despues atrobe Boneiru.”

Urbano òf Spòti tabata gusta kanta kantikanan krioyo di Rincon. No ku e tabata fast den un grupo, pero na unda tabatin tokamentu di gruponan ku ta trese muzik krioyo, e tabata gatia drenta pa haña un chèns pa kanta.

Urbano i su ruman Chati tabata inseparabel e último añanan. Nan dos tabata na un okashon tambe den e programa ‘Boneiru; Ayera pa Awe’. Despues di algun aña Urbano so tabata den Herensia.

Anneke Jansen di FuHiKuBo a monta e dos programanan aki huntu i esaki ta pasa den un produkshon mañan djaweps atardi tres’or ku diferente ripitishon e dianan benidero.