CIUDAD DE MEXICO (AFP).- Un total di 27.245 militar i miembronan di Guardia Nacional lo keda desplegá pa garantisá seguridat den elekshon general di México djadumingu benidero. Un elekshon marká pa asesinato di mas di 20 kandidato i aspirantenan, segun gobièrnu a anunsiá ayera.
Den su konferensia di prensa diario, e presidente mehikano, Andrés Manuel López Obrador, a bisa ku e operashon ta importante pa votadónan “por bai vota ku trankilidat, ku seguridat i sin miedu”.
E mandatario iskierdista tin konfiansa ku den e elekshon, ku mas di 20.000 funshon federal i lokal den disputa inkluso esun di Presidente i integrantenan di Kongreso lo ta “limpi, liber i mas ku tur kos pasífiko”.
Segun e sekretario di estado Rafael Ojeda, pa seguridat dje kandidatonan i funshonarionan elektoral nan ta konta ku 560 efektivo, entre nan 24 pa kada un dje aspirantenan pa presidensia. E kandidata pro gobièrnu aktual Claudia Sheinbaum, esun di oposishon Xóchitl Gálvez i e eks-diputado sentrista Jorge Álvarez Máynez, t’esnan den pelea pa remplasá Lopez Obrador.
E Sekretaria di Seguridat, Rosa Icela Rodriguez, a duna di konosé ku durante dje proseso elektoral, ku a start 23 di sèptèmber último, a asesiná no ménos ku 22 aspirante pa funshonnan lokal.
Den kareda di 100 mion mehikano, di un poblashon di 129 mion, tin nan karchi pa vota.
Di akuerdo ku enkuestanan ku a keda hasí, e kandidata Claudia Sheinbaum ta faborito pa gana elekshon ku 55% di preferensia, siguí pa Xóchitl Gálvez ku 33% i
Jorge Álvarez Máynez ku 12%.
