WILLEMSTAD.- Mas ku 80 kantante, artista i músiko di Kòrsou, Venezuela i Sto. Domingo lo partisipá huntu ku Shamiro Anita riba esenario den e gran konsierto “Nunka Entrega” dia 30 sèptèmber den International School.

E gran konsierto aki ta pa henter famia i tin diferente metanan sosial i edukativo, manera duna nos hóbennan i tambe adultonan partisipante posibilidat di demostrando nan habilidat i arte den músika, baile, drama, den alabansa i adorashon pa Dios.

Grandi, hóben i chikí lo bai disfrutá di un kombinashon di shownan espektakular. Lo tin bunita ekspreshonnan di arte den forma di tremendo “Laser Fingers Show”, Areal Dance, Baile, Grand Choir, Light & Fire Show i hopi sorpresa mas, kombiná ku kanto i músika varia.

Tur esnan presente lo disfrutá di 3 ora di show ku lo kuminsá 7.30 pm nèt ku un tremendo sorpresa. E evenementu aki lo ta un goso i motivashon ku lo krea speransa i pas, dunando nos muchanan i hóbennan ánimo pa e aña eskolar nobo.

Fuera di un Live Band dirigí pa Charchel Lak lo tin un kombinashon di diferente kornan grandi  i gruponan di baile i arte, esta Adonai, A El Arte, Danzando A Sus Pies, Nemae-Last i Excel Arts Academy. Komo artistanan invitá di Kòrsou lo tei Angelique Klooster i Eliazar el Mensajero.

Direktamente for di Venezuela lo tei Rosana Casares i for di Sto. Domingo Yessie Cuevas. Karchinan ta bayendo lihé i ta optenibel na Mensing, Tik Tak, Koko Loko, Beep Beep, Kas di Beibel, 24 uur Uit de Muur i via 562-2233.

Shamiro mes ta gradisí Dios na promé lugá i ta invitá pueblo pa bin gosa i gradisí Dios. Riba su wèpsait: www.shamiromusic.com por haña mas informashon i sigui Shamiro su último desaroyonan musikal.