WILLEMSTAD.- E ekipo sorpresa di playoff di beisbòl temporada 2020 Sta. Rosa Indians, ta dilanti 2-0 den playoff final. E ekipo di Bándariba djadumingu anochi a gana di Wild Cats 6-4 i a pone su mes di forma kómodo dilanti den e final di beisbòl lokal.
Wild Cats ayera a presentá ku firme intenshon pa empatá e seri, ora ku nan a skor un kareda den kada un dje dos promé entradanan. Den di dos e indjannan ta empatá na 2-2, pa despues e habridónan Risandro Pastor (Wild Cats) i Jordan Lucas (Sta. Rosa) pinta dos inning di sero. Por sierto ku despues dje promé dos anotashonann di Wild Cats, Pastor ta bai kuater inning siguí sin tuma mas kareda.
Sta. Rosa ta piki un kareda den bòm di seis (3-2), pero Wild Cats ta empatá den kabes di shete kontra dje relevista Hershelon Juliana. Sta. Rosa ta kontesta ku dos kareda den bòm di séptimo pa bai dilanti 5-3 i ta hasi 6-3 den di ocho. Wild Cats a keda kòrtiku ku un kareda den kabes di nuebe.

Pa Sta. Rosa Indians 4-11-1. Hershelon Juliana kende a tira 2.1 inning di relevo ta gana e wega. El a permití 1 hit, 1 kareda, tira 2 ponche, 1 base por bola i a soportá un homerun. Yevganni Reinita i Ildion Martina a liga di 3-2. Jurgen Stacia a konektá homerun. Pa Wild Cats 4-11.1. Risando Pastor tabatin bon labor di 6 inning, pero a karga ku e derota. El a tuma 6 hit, 5 kareda, poncha 2 i regalá 4 base por bola. Randolph Kirindongo a liga di 4-3 ku homerun, Yurendell de Caster di 4-2.

Kontinuashon:
E serie final ta sigui djamars 6 i djaweps 8 di òktober den Tio Daou Ballpark.