KRALENDIJK.– Maurice Adriaens ta keda na timon di Tourism Corporation Bonaire (TCB) pa sigur e tres aña benidero, pero komo gerente general, geneal manager. No komo direktor statutario ainda. E desishon aki a kai den seno di e hunta di komisario di TCB. Michelle Knuf, miembro di e hunta di komisario, a konfirmá na Extra ku a firma un kontrato nobo ku Maurice Adriaens komo gerente general di TCB, en espera di eventual aprobashon di Bonaire Holding Maatschappij (BHM) pa nombr’é komo direktor statutario.

Den e último simannan di aña pasá e posishon di Maurice Adriaens a bini na diskushon. Entre otro pa e aktitut krítiko ku el a asumí ora ku a bira konosí ku gobièrnu a disidí d kòrta kruelmente den supsidio ku ta duna TCB pa promové Boneiru den eksterior. E diputadonan, huntu ku e miembronan di Konseho Insular ku ta sostené gobièrnu, a hasi remarkenan ku tono vengativo den direkshon di Maurice Adriaens.

Por a sinti tambe despues ku, meskos ku a hasi ku Michael Nicolaas na BIA, nan kier a terminá relashon di trabou ku Adriaens na TCB. Entidat Públiko ta akshonista den TCB, atraves di Bonaire Holding Maatschappij. Dia 31 di desèmber último kontrato di Adriaens a terminá.

Michelle Knuf di e hunta di komisario di TCB, riba pregunta di Extra, a konfirmá ku Maurice Adriaens ta keda. “Nos no por nombr’é komo direktor statutario sin aprobashon di BHM, ku na su turno mester di derecho di voto di Entidat Públiko Boneiru. En espera di esei nos a sera un kontrakt nobo ku Maurice Adriaens, pa medio di kua nos a nombr’é komo general manager.”

Señora Knuf a agregá ku e kontrakt ku a firma ku Adriaens ta pa un periodo di 3 aña. Asina ku e aprobashonyega lo kombertí e kontrakt ku Adriaens den unu komo direktor statutario di TCB.

“Hunta di Komisario tin konfiansa kompletu den Maurice Adriaens i nos tin komo tarea pa garantisá kontinuidat den TCB i tambe stabilidat pa e empleadonan. Pa e motibu ei nos a skohe e manera aki. E intenshon ta pa e derecho di voto bin mas pronto posibel”, Michelle Knuf a bisa Extra.