LONDON, AP.- E promé minister britániko Theresa May a entregá kontròl di Brexit na Parlamento. El a bisa legisladornan ku nan mester skohe entre sali di Union Europeo riba e fecha planiá (ku òf sin akuerdo) òf pidi pa kanselá e salida.
May a bisa ku si Parlamento rechasá e akuerdo riba 12 di mart, e ta haña e oportunidat pa vota riba e posibilidat pa bandoná e bloke sin akuerdo. Si e opshon pa sali sin akuerdo wòrdu rechasá, manera e minister ta premirá, lo bini un votamentu pa pidi Union Europeo pa kambia e fecha di salida pa tres luna despues.
Gran Bretaña mester bandoná UE riba 29 di mart, pero te ainda gobièrnu no a logra haña aprobashon di parlamento tokante e términonan di salida ni futuro relashon ku e bloke. Un separashon sin akuerdo ta kaótiko pa empresa i individualnan den Gran Bretaña i den e 27 nashonnan ku ainda ta forma parti di Union Europeo.
May a reiterá vários biaha ku Gran Bretaña lo bandoná e bloke di Union Europeo segun e fecha palabrá.
E petishon mester wòrdu aprobá pa e otro 27 paisnan di e bloke. E presidente di Konseho Europeo Donald Tusk a deklará djaluna ku e paisnan lo “mustra komprenshon i bon boluntat” miéntras ta konsiderá e pedido aki.
