LONDON, AP.- E promé minister britániko, Theresa May, a pidi Union Europeo pa posponé Brexit te 30 di yüni, pa duna London tempu pa prepará un proseso nobo i evitá un separashon kaótiko.
Sinembargo un lider klave di e bloke a sugirí un pouze mas largu den e proseso difísil di separashon aki. E pregunta tokante e fecha di retiro ta vital pasó segun programa, Gran Bretaña lo bandoná UE sin un akuerdo di salida riba 12 di aprel, si e pais no logra yega na un akuerdo den un kumbre di Bruselas ku lo tuma lugá dos dia promé.
Den un karta dirigí na e presidente di Konseho Europeo, Donald Tusk, May a bisa ku “Gran Bretaña ta proponé pa e periodo finalisá riba 30 di yüni 2019” i si ta nesesario e pais lo elaborá plannan di kontingensia pa partisipá den e elekshon di Parlamento Europeo ku mester sosodé entre 23 pa 26 di mei.
Tusk a proponé un tempu mas largu i a pidi e 27 paisnan pa ofresé un tempu mas fleksibel di sigur un aña pa sigurá ku Brexit no ta resultá kaótiko, loke por mina e komersio mundial gravemente.
