LONDON, AP.- E drama di Brexit a prolongá djárason despues ku promé minister Theresa May i e partido di oposishon prinsipal a purba yega na un akuerdo pa evitá un separashon kaótiko entre Gran Bretaña i Union Europeo.
E dirigente a purba yega na un konsenso ku e lider laboritsta Jeremy Corbyn despues ku parlamento a rechasá su akuerdo tres biaha.
May a anunsiá ku e lo pidi UE pa posponé e fecha di separashon atrobe, pa evitá un separashon kaótiko riba 12 di aprel.
“E pais mester di un solushon, e pais meresé un solushon, i mi ta hasiendo tur esfuerso pa haña esaki”, asina May a bisa na legisladornan djárason promé ku el a reuní ku Corbyn durante dos ora.
E gobièrnu i tambe laboristanan a kalifiká e enkuentro komo unu konstruktivo i a anunsiá ku lo bolbe reuní awe.
E despacho di May a ekspresá ku ámbos parti a mustra “fleksibilidat i kompromiso pa pone fin na e insertidumbre aktual pa ku Brexit”.
