WILLEMSTAD.-  Despues ku Maya Marin a hasi un tremendo debut na 2016 ku ‘Asina Asina’, Tsunami Aruba ta bèk ku un kansion promoshonal nobo, titulá ‘Nog Steeds’.
Maya Marin i Carl Roosberg mihó konosí komo Galloway ta interpretá e  produkshon nobo aki ku a keda komponé pa Aimée Silvanie i Joäne Martina ku ta operá bou di e nòmber di ‘Deep Texture’.
Na 2016 Deep Texture a komponé  e hit ‘Asina Asina’ kantá pa Maya Marin i na 2017 ‘Djis un ratu’, kantá pa Mitch Almary. Pa e produkshon nobo aki Tsunami Aruba a aserká e konosido kantante i músiko, Quincy Comenencia, di kual a keda enkargá ku e parti di areglo.
‘Nog steeds’ ta un 'zouk kombiná', ku letranan di e idiomanan papiamentu, ulandes i un koro atraktivo ku e konosido dicho na franses: "oh la la". Ku e forma di meskla ritmo, idiomanan, pensamentu i kustumbernan, e tim tras di e kansion aki ta prueba ku músika ta universal.
Tsunami ta sumamente kontentu di por brinda e regalo aki riba e plataforma lokal i tambe internashonal. Pronto nan lo por presentá e kansion aki tambe durante di nan tournan i konsiertonan ku tur aña di nobo nan ta bishitá na Ulanda, Antwerpen i tambe St. Maarten.
E tim di maneho di Tsunami Aruba di antemano ta gradisí kada unu pa nan sosten i ta deseá mundu kompletu pa disfrutá di e bunita kansion ‘Nog Steeds’.
‘Nog Steeds’ lo kuminsá zona na tur nos radioemisoranan. Tambe hóben- i grandinan por busk’é riba SoundCloud, Youtube òf e página di Facebook di Tsunami Aruba i Deep Texture.