WILLEMSTAD.- MC Don T i produktor Ulandes/ DJ Sam Blans a keda kontratá pa 2 show na Haiti riba dianan 22 i 24 di novèmber próksimo, un na Cap Hatian i un na e siudat kapital, Port au Prince. E artistanan lo forma parti tambe di un dokumental riba inisiativa di William McIntosh di e kompania di produkshon sinematográfiko Haitiano, ‘Muska Group’. Don T i Sam Blans na diferente okashon a presentá huntu aki na Kòrsou i Ulanda. Ta durante di un dje presentashonnan aki ku nan presentashon a kapta atenshon di Sergio Valkenburg, un representante turístiko di Haiti. E dokumental lo konta e historia di e artistanan ku ta pashoná riba ‘afro beats’. Nan interes komun ta pone nan huntu riba ruta pa e kaminda unda e zonidonan aki a bin di dje. E produktor i DJ haitiano. Gardy Girault lo introdusí nan na e ritmonan lokal, e historia i kultura dje pais. Na 2013, Gardy a lansa un serie di fiesta ku e título ‘No Passport’, ku e meta pa uni e diáspora musikal i ritmo afrikano pa promové Haiti su kultura na un públiko diversifiká. Don T, konosí pa su presentashon internashonal durante di Tomorrowland ku Menasa, i ku a representá Kòrsou na China awor lo pone Kòrsou riba e mapa na Haiti. Durante nan bishita na Haiti, Don T i Sam Blans lo uni den studio ku artistanan haitiano, pa produsí un ‘track’ ku toke internashonal. Mientrastantu Don T lo introdusí nos idioma i nos ritmo di tambú na Mundu. Siman pasá Don T i Sam Blans a presentá huntu den Club Vanilla i lo ta huntu atrobe e siman aki durante e selebrashon di e di 10 aniversario di Cabana Beach, esaki promé ku nan sali pa Haiti. Union: Nada no ta importá, músika semper lo uni un pueblo!.