WILLEMSTAD.- Djasabra 8 di febrüari último riba e parkeo di TeleCuraçao MCB sòftbòl tim, Hats off to Dreams i Vise Vèrsa a uni forsa pa organisá un magno evento ku a akapará míles di hende.
E konsepto nobo “Rei di Kaya” sigur a haña akseptashon di pueblo di Kòrsou mirando tur e bunita reakshonnan ku nos a risibí tantu pa e sitio nobo, e infrastruktura ameno i tambe e bon ambiente ku ta tin.
Tabata un satisfakshon enorme pa mira un públiko grandi gosando tur afó di tantu e 'roadfire', tumbanan di ayera i esnan di awe interpretá pa tur nos reinan di kaya. Danki di kurason na tur nos partnernan ku a hasi e evento posibel.
Un danki na tur agrupashon musikal i diferente kantantenan pa nan animashon kampion, danki na nos Rei di Tumba 2020 ku a pone un i tur bula i un danki spesial na nos patrosinadornan TeleCuraçao, Amstel Bright i BSure pa nan sosten total.
Na nòmber di MCB sòftbòl tim, Hats off to Dreams i Vise Vèrsa nos kier a gradisí pueblo di Kòrsou en general pa e aseptashon i nos ta sigui traha pa 2021 nos presentá un edishon mas di Rei di Kaya!. Potrètnan kortesia di Luigino da Costa Gomez.