KRALENDIJK – Korte den Promé Instansia a duna un veredikto na fabor di Maduro & Curiels Bank (MCB) i kontra un demandante den un kaso di integridat finansiero dudoso. Esaki ta un desishon ku hues mr. Van Voorthuizen a tuma riba 17 di yüli 2021. Abogado mr. Winkel a representá e demandante, miéntras abogadonan mr. Van den Heuvel i mr. Willems a representá e kontrapartido.

E demandante tin 8 kuenta na Maduro & Curiels bank. Na dado momento MCB a duda e integridat finansiero di su kliente. Konsekuentemente MCB a pone su kliente na haltura ku e ke kibra nan relashon bankario. E demandante no tabata di akuerdo ku esaki, pues el a entamá un kaso sivil kontra su banko pa evitá ku esaki lo kibra kontrato kuné.

Korte den Promé Instansia a haña ku MCB a demonstrá ku si e permití e kliente mantené e 8 kuenta di banko ta trese rísiko pa e integridat i reputashon di e banko.

E demandante na su turno ta bisa ku el a aserka otro bankonan ku a neng’é di habri un kuenta. Hues a haña ku un persona mester tin akseso na un kuenta di banko pa por tuma parti den komunidat na un manera responsabel.

Korte a disidí ku MCB mester anulá tur kuenta di e demandante, ku eksepshon di un. Riba e kuenta aki e demandante ta risibí su penshun. Pues e demandante por mantené 1 kuenta koriente.

Konsekuentemente e demandante a apliká pa un tarheta di krédito riba e kuenta aki, loke MCB a ninga. E demandante a aserka korte pa un desishon. Korte den Promé Instansia a duna MCB rason. E demandante ta keda hasi uso di solamente 1 kuenta koriente riba kua e ta risibí su penshun i por lanta sèn na bankomátiko, e no por hasi mas nada ku e kuenta.