Fanátikonan di deporte, bon dia. Awe ta dia di poko tenshon relashoná ku aserkamentu di loke por bira tormenta tropikal Bonnie. Laga nos kuida.

Meday’i Oro

Ounke un dia e mester a sosodé, e echo ku Atletiek Unie a publiká nòmber di su atletanan pa Kampionato Mundial sin ku Churandy Martina ta aparesé, a pone nos realisá ku esun ku a habri porta pa vários otro atleta ya no ta riba e nivel di ántes.

Meday’i Oro

Riba su mes esei ta algu ku mester a sosodé un dia. Na edat di 37 aña i sinku wega olímpiko tras di lomba, no ta nada straño ku Churandy tin ku bringa dòbel mas duru kontra di atletanan hóben. E mes a bisa ku ta su deseo pa bai Paris pa su di seis eksperensia olímpiko.

Meday’i Oro

E deseo ei a bira unu hopi difísil pa e realisá, sigur si tene kuenta ku ta bastante sprinter di 20 aña i ménos Hulanda ta produsiendo. Esei ta trese kuné ku individual e tarea ta bira hopi mas pisá i konsekuentemente pa e drenta team di relevo tambe ta muchu mas difísil.

Meday’i Oro

Ekiponan di Kòrsou den Intermediate regional ta hunga e wega riba un nivel bastante superior na e demas ekiponan. Ayera atrobe dos wega ku skor abultá na fabor di ekiponan di Kòrsou. Si sigui asina, esei ta nifiká ku Kòrsou su ekiponan lo topa otro den final. Pero ainda mester mira kon ta sigui ku e programa di weganan.

Meday’i Oro

E mal tempu ku ta na kaminda a brua tur kos i komo tal District Administrator i su team organisadó mester a traha riba alternativa kon e torneo ta sigui. Sigur ta ku awe i mañan lo no tin wega. Te ku ayera nochi, e desishon tabata ku djabièrnè awor lo hunga e weganan ku mester a tuma lugá awe i mañan. Djasabra ta hunga weganan semi final i final.

Meday’i Oro

T’asina kos ta bai, tambe den deporte. Bo por plania i bo por tin un programa kasi perfekto. Pero finalmente tin loke nos ta yama ‘force majeure’ ku den un fregá di wowo por brua tur kos. Den kaso dje torneo Intermediate, ban spera ku pa djabièrnè si por dal bai.

Meday’i Oro

Lamentabel sigur e situashon di Kenley Jansen ku awor aki den bon forma, tin ku pèrdè por lo ménos 2 siman pa motibu di problema ku salú. Manera grandinan ta bisa, salú promé ku tur kos i komo tal e mester kuida. Algun dia di sosiegu i asistensia médiko lo por permití ku pa medio yüli e tei di regreso den aliniashon di Braves.

Meday’i Oro

Na tur nos lektornan, kuida kurpa e dianan aki. No hasi kos di hende prufiá, skucha outoridatnan i ban spera ku pa e siman aki mes tur kos ta keda oké.

Meday’i Oro

Nos quote pa awe: “No tur tormenta ta bin pa destruí. Tin ta bin pa limpia e kaminda ku bo mester kana”.