WILLEMSTAD.- Pa mas ku 21 aña ‘Strak Strak Barbershop’ ta organisá presentashon di gruponan di tambú riba e djaweps anochinan ku tin ‘Nochi di Kompra’ den temporada di fin di aña.
Germain Brunken, doño di Strak Strak Barbershop a tuma e desishon di stòp ku presentashon di gruponan di tambú debí ku e medidanan ku Polis ta mara e otorgamentu di pèrmit pa evento na Strak Strak ta demasiado drástiko.
EXTRA a entrevistá Germain Brunken ayera tardi i e konosido promotor i barbero tabata realmente indigná ku e eksigensianan ku a pone den e pèrmit.
‘Nunka no tabatin niun problema. Nunka Polis a duna asistensia. Pa hopi aña nan ta poniendo pia. E pòmp di gasolin te problema. Nos a usa lint ku barí oraño, e siman aki nos a bini ku dranghek’, Brunken ta splika.
Mas aleu Brunken a bisa ku na kuminsamentu e tabata usa 2 bewaker, despues a pasa pa usa 3, 4 i e último 2 simannan e tabata usa 6 bewaker. Awor a pone e kondishon ku mester usa 10 bewaker pa por kontrolá e área i a eksigí ku mester pone ‘bouwhek’.
’80 florin pa bewaker pa anochi. Pa zet af e bouwhek bo mester di 100 meter di bouwhek ku ta kosta 800 florin. Bo tin ku pone ‘portapotty’ (toilet portátil), anto bo entrada ta minimal’, Brunken ta sigui splika

CUROIL
“ Siman pasá CUROIL a bini i nan a sera e ‘valve dispensernan’. CUROIL a bini 6.45 di anochi i a sera e ‘valve’ dje tanki, kita koriente for dje pòmp, loke ta pone ku e pòmp no tin gasolin i no tin koriente.

INDIGNA
Germain Brunken ta rabia pa motibu ku siman pasa a bini ku e kondishon riba mesa, esaki despues di un rapòrt di veiligheidsinspectie. “Ora bo puntra dikon e kondishonnan aki, nan ta bisa bu ku e òrdu ta bini di djariba. Bo por haña hopi advies, Minister i Korpschef ta evaluá tur kos i duna pèrmit. Nan ke kaba ku e kultura. Nan no ke tuma molèster pa asistí na niun aktividat. For di 2 pa 3 aña pasa nan ke para e tambú i buska pa mengua esaki. E no ta hustu”.
Brunken ta lamentá ku Kas di Kultura no tin niun hende ku ta sali i bringa pa gruponan di tambú. E ta duna komo ehèmpel ku Marcha di Karnaval tin diferente pòmp di gasolin riba su ruta, pero pa esaki no tin opheshon i ta puntra ‘Ku ki midi bo ta midi’.
Pa Brunken e echo ku ta pone e eksigensianan ta “Un akto puramente di mala fe p’asina ei kaba un aktividat di hopi aña”. E ta haña e desishon komo un trapa den kara.
Mas aleu Brunken no tabatin bon palabra pa e hefe di departamento di pèrmit di Polis, Sr. Gregory Gonzalez.
“Gregory Gonzalez, Chayenne ta un músiko, man drechi di Feco, ta doe mee na e kosnan aki. Ta un bèrgwensa. Ta un bèrgwensa, ku un hòmber manera Chayenne ta doe mee na e kosnan aki. Ku un arogansia, no ta buska solushon. ‘Ta un rapòrt tin, te rapòrt mi ta mantené’. Sali for di e kantor bo bin akibou ora tin tambú bo ta mira kiko ta pasa. No papia ko’i kèns ku bo no sa!”
Finalmente Brunken a indiká ku “Nos tin hopi aña ta bringa kontra di e forsanan maligno aki”.