WILLEMSTAD – Un mega operashon polisial ku a kuminsá for di 2'or di mardugá ta tumando lugá den área di Santa Marta, Hanchi Buriku i bisindario. E operashon di gran magnitut ta relashoná ku investigashon di diferente kaso di atrako. Un kantidat enorme di unidatnan polisial a keda desplegá den e áreanan menshoná, kaminda outoridatnan a hasi entrada hudisial den por lo ménos seis te shete kas.

Ta trata di un operashon di gran magnitut, ku ta envolví diferente unidat spesialisá di polis i otro instansianan di seguridat. E entradanan hudisial ta plamá den diferente parti di e barionan, kaminda ekipo polisial ta aktivo den e investigashon.

Entre e unidatnan ku ta partisipando den e operashon tin e Tim di Aresto, Tim di Transporte i Tim di Atrako. Ademas, e operashon a keda refor­sá ku miembronan di unidatnan di Narkótika, Joyriding, Marechaussee, Wardakosta i DGC (Krímen Organisá).

E despliegue di outoridatnan ta sumamente grandi. Na momentu ku e diferente unidatnan tabata preparando pa inisiá e operashon, tabata por mira un karavana largu di vehíkulo di polis i otro instansianan di seguridat ku tabata dirigiendo nan mes pa e área.

Segun informashon nobo ku EXTRA a risibí, e operashon a kuminsá for di 2'or di mardugá i ta relashoná ku investigashon di kasonan di atrako. Sinembargo, ainda no ta konosí eksaktamente kua kasonan ta bou di investigashon, ni kiko outoridatnan ta buskando den e diferente kasnan. Tampoko no tin konfirmashon ainda si a realisá detenshon durante e akshon polisial.

E operashon ta sigui den e área, miéntras ku diferente unidatnan ta kontinuá ku nan trabounan. Ta keda pendiente pa mas informashon tokante e resultado di e mega operashon polisial.