WILLEMSTAD.- Ayera despues di e deskanso di un presentashon periódiko di e Kor di Maestronan Penshoná den Atrium di Banko Sentral di Kòrsou i Sint Maarten na Skalo, direktor Mishane Arrindell di Mensing’s Caminada a hasi un donashon di e bunita suma di 2500 florin. Esaki ta sirbi komo kontribushon na e gastunan ku tin pa e ensayo i konsiertonan di e kor aki.
Djadumingu e kor aki a duna un konsierto bou di e lema ‘Ban bèk ku pashon, eksperensiá kon kanto por tòchi kurason’. Djis despues di e deskanso e lider di kor señora Viola Ravenstein a anunsiá un sorpresa. Pa esei el a invitá señora Helga Mensing pa subi tarima. Señora Mensing, na nòmber di akshonistanan i gerensia di Mensing’s Caminada, a splika a base di kiko nan a disidí pa hasi un donashon aki na e kor.
Na promé lugá, e kor ku su presentashonnan ta duna un kontribushon balioso na preservashon di hopi di e kantikanan tradishonal di nos isla. Ku esaki nan ta karga tambe e patrimonio kultural di Kòrsou di un forma positivo, di moda ku generashonnan binidero tambe lo lanta ku e kantikanan. Ademas ta hunga un papel ku su ruman muhé, Vigdis Jonckheer-Mensing defuntu, durante 1976 te 1998 a sirbi komo miembro di direktiva den Direktiva di Skolnan Katóliko (RKCS), i di esei e último 11 añanan komo su presidente.
Gran mayoria di e integrantenan di e kor ta konsistí di èks dosente ku a traha na skol di direktiva katóliko. Señora Ravenstein a konta ku e mes tabatin di aber hopi ku señor Vigdis Jonckheer-Mensing, promé komo kabes di skol i despues komo funshonario di enseñansa na RKCS.
Komo homenahe póstumo na Vigdis Jonckheer-Mensing el a anunsiá ku e kor ta bai presentá un kantika ku nan sa ku e tabata gusta mashá.