MERKA, AP.- Kasi mitar di e kadetnan di Akademia di Wardakosta a bisa ku nan a wòrdu intimidá seksualmente i un di kada ocho a reportá kontakto seksual no deseá, segun un estudio di Pentágono publiká djárason.
E enkuesta anónimo, realisá na aña 2018 den e akademia na New London, Connecticut, ta revelá ku 45% di hende muhé i 17% di hende hòmber a indiká ku nan a wòrdu intimidá seksualmente, kompará ku 36% i 11% respektivamente na aña 2016.
E porsentahe di kontakto seksual no deseá ta esun mas haltu desde komienso di e enkuesta 10 aña pasa.
Tur e akademianan di forsa arma ta “enfrentando un krísis di abusu seksual i nos no ta tumando medida”, asina legislador demorkata Jackie Speier a bisa den luna di yüni. E kier krea un programa piloto di kuater aña pa un estudio independiente di tur denunsia di atake seksual den e akademianan aki.
Mayoria kaso di kontakto seksual no deseá a impliká kadètnan di e mesun kurso. 65% di e kadètnan muhé i 85% di e hòmbernan a bisa ku e outor di e abusu tabata un kompañero den lès.
