WASHINGTON, MERKA, AFP.- E sekretario di estado merikano Antony Blinken a bisa djárason ku a sera un akuerdo pa entrega vakunanan di COVID-19 na zonana di konflikto, kaminda e tasa di vakunashon ta abou.

Blinken a bisa ku Merka a traha ku Covax, e aliansa di vakuna internashonal pa sostené nashonnan pober, pa proveé dósisnan di Johnson & Johnson na e nashonnan aki.

“Nos kier yuda esnan ku ta pasando den difikultat haña protekshon kontra COVID-19 mas pronto ku ta posibel”, asina Blinken a bisa.

“Nos ta na altura di e urgensia di e bataya aki. nos sa kiko mester hasi pa para e pandemia. I awor mester hasié”, asina el a añadí.

No a anunsiá detayenan tokante e kantidat di vakuna inkluí den e akuerdo.

Te ainda a distribuí mas di kuater miar vakuna rònt mundu, segun un konteo di AFP. Pero mayoria a bai pa paisnan riku i tambe India i China.

Presidente Joe Biden a anunsiá den sèptèmber ku Merka lo duna mas di un bion dósis rònt mundu pa yuda kombatí e pandemia. Su meta tabata pa vakuna por lo ménos 70% di e poblashon global den un aña.