WASHINGTON, USA (AFP).- Merka no ta involukrá den e atake aéreo kontra e edifisio di konsulado di Iran den Siria, ku Teherán ta atribuí na Israel, ni tampoko a keda informá adelantá, segun fuentenan ofisial a bisa ayera.
Iran a primintí di tuma represaya pa e atake den Damascus, den kua mas ku diesdos persona a muri, inkluso alto mandonan di Guardia Revolushonario iraní, miéntras Israel te ku ayera tardi a nenga na duna komentario.
“Nos no tabatin nada di aber ku e atake na Damascus, nos no tabata envolví di ningun manera”, segun e bosero di Konseho di Seguridat Nashonal, John Kirby.
E funshonario a kalifiká komo “ko’i kèns” e komentarionan dje minister di Asuntunan Eksterior iraní, Hossein Ami Abdollahian, den sentido ku Merka, e prinsipal aliado di Israel, tabata responsabel pa e atake.
E vise-sekretario di prensa di Pentágono, Sabrina Sinth, tambe a bisa ku forsanan di Washington no a hunga ningun papel den e bombardeo, i ku Merka lo transmití esei pa Teherán via kanalnan privá.
“Nos no a keda notifiká pa e israelínan riba e atake òf e meta di nan atake na Damascus”, segun Sinth a bisa na periodistanan. Medionan di komunikashon estatal iraní a informá ku 13 persona a muri den e suseso di djaluna, i ku shete di nan ta miembro di Guardia Revolushonario i seis ta siudadanonan sirio.
