WASHINGTON, USA (AFP).- Merka lo retrasá di 2025 pa 2026 su plannan pa bolbe manda atronoutanan riba superfisie di luna relashoná ku e mishon Artemis 3, segun e atministrador di NASA, Bill Nelson.
Artemis, yamá di e forma ei komo ruman di Apolo den mitologia griego, a keda anunsiá ofisialmente den 2017 komo parti dje plannan di e agensia espasial norteamerikano pa establesé un presensia permanente den e bisiña selestial mas serka di tera.
Su promé mishon, yamá Artemis 1, un buelo sin tripulashon pa bai luna i regresá, a keda realisá den 2022 despues di vários retraso.
E mishon Artemis 2 a keda posponé for di final di e aña aki pa sèptèmber di 2025, segun Nelson a indiká.
Artemis 3, den kua pa promé biaha den mas di 50 aña dos persona lo pone pia riba luna , awor lo tuma lugá den sèptèmber di 2026.
“Seguridat ta nos prinsipal prioridat”, segun e dirigente di NASA, kende a anunsiá “mas tempu pa traha riba e desaroyo” dje proyekto Artemis.
“Apesar dje aplasamentu, realmente mi no ta kere ku China lo baha riba luna promé ku nos”, segun el a agregá.
Ta e intenshon pa e mishon Artemis 2 dura 10 dia ku kuater astronouta na bordo den un paseo rònt di luna. Tres norteamerikano Reid Wiseman, Victor Glover i Christina i e kanades Jeremy Hansen ya ta den fase di training.
E mishon aki a keda aplastá pa motibunan di seguridat, ya ku mester resolvé vários problema promé ku e lansamentu, segun Amit Kshatriya, un responsabel haltu di NASA.
E promé ta referí na e loke mester protehá e kápsula Orion ora ku esaki regresá den e atmósfera di mundu. Durante di Artemis 1, esaki a kima, loke no tabata e intenshon.
E proyekto pa regresá luna di e agensia norteamerikano tambe ta buska pa konstruí un stashon espasial yamá Gateway.
E fase Artemis 4, ku ta sigui programá pa sèptèmber di 2028, lo ta e promé mishon di e stashon nobo Gateway.
