WILLEMSTAD.- Presidente di AMAK, Sr. Manfred ‘Feco’ Gomes tabata enfátiko den su kontesta na momentu ku a puntr’e kiko ta su reakshon riba e situashon aktual di medidanan.

‘Nan mester habri farándula, no por sigui wanta mas. Tur kaminda na mundu esaki ta tumando lugá. Wak Aruba, Merka i Hulanda, dikon na Kòrsou nos no por hasié?’

Feco ta di opinion si ku mester laga aktividatnan kaba mas trempan, ‘esei ta tragabel’, asina Feco a indiká.

‘Fiestanan mester kaba mas trempan, sea 2or òf 3or di mardugá. Mester eliminá e ‘toke de keda’ pa bida nokturno por drai. Loke si mi ta di akuerdo kuné ta ku mester sigui e reglanan di higiena i mantené distansia, meskos kontròlnan ku lo por tuma lugá’.

Finalmente Feco a indiká ku mirando ku e sifranan ta bahando satisfaktoriamente, e kantidat di hende interná den CMC a baha, ta momentu pa nos kuminsá bai den direkshon di nos bida normal bèk, pero mester sigui kuida.