WILLEMSTAD.- Pa e siman aki AMAK lo ke tin klaridat pa loke ta trata kon lo organisá Festival di Tumba 2018.
For di despues ku Festival di Tumba 2017 a terminá i ku UTS, un dje partnernan prinsipal di Festival di Tumba a indiká ku nan lo no partisipá mas den e evento AMAK a hañ’é den un situashon kaminda kontinuashon dje evento musikal mas grandi di Kòrsou ta den un problema grandi.
Lunanan a pasa i te ku awe te ainda no tin un klaridat ken definitivamente ta bai organisá huntu ku AMAK e festival. Durante di último simannan tin negoshashon ta tumando lugá ku sigur dos grupo ku a aserka AMAK.
Informashon ku ‘DEN E BEMBE’ tin ta indiká ku sigur ku un dje gruponan e kombersashon ta basta avansá, miéntras ku e di dos ta basta interesá pa djòin e produkshon dje evento.
Puntonan di diskushon ainda ta detayenan chikí ku mester keda resolvé pa por bisa definitivamente ku e produkshon dje evento lo ta kla.
Ayera nochi ‘DEN E BEMBE’ a kombersá un ratu ku presidente di AMAK, Sr. Manfred ‘Feco’ Gomes kende a informá ku awe ta sigui reuní. ‘Pega kos lo no pega. Mester kaba di yega na un akuerdo pa dje forma ei reuní ku miembronan di AMAK’, asina Feco a indiká.
Un dje puntonan masha importante den e reunion ta loke AMAK  ta para pe ku no por mishi ku e entrada di e músikonan ku ta e atrakshon prinsipal dje evento!.