WILLEMSTAD.- Aktual direktiva di Federashon Beisbòl Kòrsou (FEBEKO) ta kontinuá ku su plan pa elevá nivel di selekshon di beisbòl di Kòrsou. E proyekto “Curaçao Baseball” ku nan a lansa ketu bai ta riba mesa. FEBEKO den un komunikado emití ta asentuá ku e meta ta pa Kòrsou partisipá na eventonan internashonal di beisbòl bou di nos mes bandera. E meta final ta pa Kòrsou subi di posishon riba WBSC World Baseball Ranking.
Pa tur esaki bira realidat, FEBEKO a instalá e komishon di Curaçao Baseball Sport Development den luna di yüli di 2020. E tarea dje entidat aki ta pa desaroyá beisbòl nashonal tantu riba nivel lokal komo internashonal. Banda di esaki, FEBEKO riba rekomendashon di e komishon a nombra Paddy Roomer komo direktor komersial di e programa di Curaçao Baseball i tambe un komishon pa organisá e 3er Caribbean Baseball Cup ku lo tuma lugá aki na Kòrsou den luna di aprel próksimo.
FEBEKO mas aleu ta duna di konosé ku beisbòl di Kòrsou mester por figurá entre e Tòp 10 di mundu. Nan ta traha pa logra e meta ei, konsiente dje echo ku ta algu grandi i ta rekerí pa tur stakeholders den deporte di beisbòl apoyá i aportá na esaki.
Peloteronan profeshonal di Kòrsou manera Andruw Jones, Ozzie Albies, Jurickson Profar, Jonathan Schoop i vários otro ya a komprometé nan mes di lo sostené i apoyá nos selekshon nashonal i e futuro plannan di FEBEKO.