CIUDAD DE MEXICO, MEXICO (AFP).- Omar Garcia Harfuch, un polis ku hopi eksperensia i kende a sobrebibí un atentado di narkotrafikantenan den 2020, a keda nombrá komo sekretario di Seguridat pa e presidente eligí di Mexico, Claudia Sheinbaum.
Garcia Harfuch, di 42 aña, ta tuma un dje retonan di mas grandi dje gobièrnu di iskierda ku lo drenta funshon dia 1 di òktober benidero.
E minister nobo a traha komo hefe polisial di Sheinbaum tempu ku esaki tabata alkalde di Ciudad de Mexico (2018-2023) i ta atribuí na su persona logronan manera un redukshon drástiko di asesinato i otro delitonan serio, loke a trese kuné ku su simpatisantenan a dun’é e apodo di “Batman”.
“Den e periodo ei, miéntras mi tabata hefe di gobièrnu, nos a logra un bahada históriko di 50% di homisidionan i 60% di delitonan di impakto serio”, den e siudat, segun Sheinbaum.
E mandatario a atribuí e resultadonan ei na un strategia ku a kombiná invershon sosial, mehorá e kapasidatnan di investigashon di polis i mayor kordinashon entre polis i ministerio públiko, un plan ku awor e ke pone funshoná na nivel federal.
Mexico, pais di 126 mion habitante, a akumulá 450.000 asesinato i alrededor di 100.000 hende kendenan a disparsé for di kabamentu di 2006 na momento ku gobièrnu dje presidente konservador Felipe Calderón (2006-2012) a lansa un polémika kampaña di ofensiva militar anti droga.
