MEXICO, AP.- E gobièrnu di México a anunsiá ayera ku e ta pone 50 mion di dòler pa kontratá abogadonan pa defendé nan hendenan ku ta keda deportá di Merka.

E rekursonan ta keda kanalisá mediante di e konsuladonan mèksikano na Merka i tambe nan ta finansiá programanan di difushon pa promové e rèspèt pa derechinan di mèksikanonan, asina e sekretario di relashonnan eksterior Luis Videgaray a bisa.

“No ta trata di torpediá e aplikashon di lei na Merka ni muchu ménos oponé e aplikashon di lei”, asina el a agregá.

“Nos ta bai enfoká e rekursonan riba e ophetivo fundamental, ku ta defendé e derechinan di mèksikanonan. Esei ta nifiká asesorá di forma legal, duna informashon, kontratá abogadonan kaminda esaki ta nesesario”.

Videgaray a sigui bisa ku México ta komprondé bon ku ta bai bira nesesario hasi algun moveshon adekuá esaki entre otro refiriendo na e tratado di komersio liber di Nort Amérika ku Merka i Canada. E mandatario merikano Donald Trump a komprometé su mes na re-negoshá TLCAN. Sinembargo México lo no aseptá un regreso na e politikanan protekshonista manera e sistema di kuota di importashon asina Videgaray a sigui bisa.

E hefe di diplomasia mèksikano a señalá ku den e negosiashonnan ta inkluí e komersio elektróniko ku no tabata eksistí tempu ku TLCAN a drenta na vigor na 1994.

Videgaray no a spesifiká kua ta e otro kambionan ku México lo ta dispuesto na aseptá pero a bisa ku nan ke un negoshashon integral  kaminda tur tema ta forma parti di e kombersashon i diálogo i nan lo no keda solamente na aseptá por ehèmpel den kasi di komersio sin ku ta diskutí e temanan migratorio i di seguridat.

...Haydee Lavariega kende a bai biba Merka 13 aña pasá ta yora protestando kontra di e òrdu di Donald Trump...