WILLEMSTAD.- Reuel Rogers mihó konosí bou di e nòmber ‘Bboy Crunk’ no ta deskonosí den mundu di baile. Ta trata di un hóben talentoso ku a kosechá bastante éksito ganando entre otro e kompetensia “International Hip Hop dance” di Ulanda na aña 2016. Sinembargo loke ta hasi Reuel un bailadó eksepshonal ta su dominio tambe di diferente tipo di baile, manera entre otro baile kontemporáneo i hopi mas.
El a kuminsá baila for di su di 8 aña. Esaki a dun'é e oportunidat di siña diferente téknika di baile manera : Ballet, breakdance, modern, jazz, capoeira, acrobatics, experimental, tango, kizomba, afro i hip hòp.
Reuel tin hopi eksperensia den baile. Esaki el a logra di desaroyá den transkurso di añanan.  Reuel a traha 6 aña komo dosente di breakdance i hip hòp na Fina Dance Art School, 4 aña na Circo Magic, 6 aña na Luna blou i a studia na Codarts (professional dance school).
Su abilidat a kondusié na baila pa artistanan internashonal manera Jerimih i Rick Ross. Esaki no ta tur kos. Anteriormente Reuel a gana e kompetensia di talento “Luna yen”, Queens day battle na aña 2009, 2 versus 2 battle na PSC na aña 2011.
Aktualmente Reuel Rogers ta  kla pa sigui krese i bai mas profundo den e mundu di arte aki. E ta deseá di hasi esaki pa e por duna bèk na su studiantenan i na pueblo di Kòrsou. Reuel ke regalá su pueblo algun workshop di baile grátis, ku lo enserá diferente estilo di baile.
Den kuadro di esaki Reuel ke hasi un apelashon na tur persona ku lo ke sosten’é pa bai algun lès i trainingnan den eksterior e.o na China, Ulanda ets. ku lo tuma lugá den òktober 2017.  E meta ta pa despues di risibí e workshopnan aki e regresá Kòrsou den novèmber ku mas konosementu di diferente tipo di baile i traspasá su e konosementu gratuitamente na pueblo di Kòrsou.
Ya tin planifiká pa Reuel duna e tayernan di baile den sentro di bario Seru Fortuna, Soto i Montaña Abou. Reuel mester hasi tur pago pa e workshop i trep aki entrante 15 di òktober pa mas tardá.
Un apelashon ta bai na tur persona, organisashon òf kompanianan ku ta interesá pa duna un aporte finansiero na Reuel Rogers pa di e manera ei e logra su meta  i yuda otro hóbennan su soño bira realidat.
Pa mas informashon òf pa donashon por tuma kontakto libremente kuné. Manera ulandesnan ta bisa “alle beetjes helpen”. Tuma e kurashi pa sembrá un simia den e hóben aki su bida. Awe ta di dje, mañan por ta di bo. Pa mas informashon por tuma kontakto na: Reuel-Rogers@hotmail.com òf na Tel : +5999 520-7139.