WILLEMSTAD- E kantoutor yu di Kòrsou Ced Ride a lansa un komposishon nobo titulá Mi Lenga Folklor kaminda e ta pone hopi asento na e frase Ma Nase Ku Mi Lenga na Boka. Un komposishon fásil pero ku un profundidat di letra ku ta duna honor na papiamentu, nos bunita idioma.

Ced a dediká hopi atenshon na e komposishon aki kaminda tin wega di palabra ku tantu grandi komo chikí por kaptá. E ta un komposishon ku musikalmente tin e ritmo di guaracha. E  instrumentonan ku ta kompaña e kansion aki ta kitara spañó, kuarta, kontrabas i klarinèt.

Un komposishon toká i grabá den kurá di kas. E komposishon aki tin su video klep ku ta mustra partinan kultural i kolorido di Kòrsou kaminda nos pueblo sa gusta bishitá durante dia  i tambe ta duna atenshon na nos futuro generashon kual ta nos muchanan di skol. Ced Ride mes ta kanta e kansion aki i ku e sous nesesario i filosófiko ku Ced so por trese den su kansionnan.

E komposishon aki ta un tremendo komposishon ku un uso di balor haltu di nos idioma papiamentu. E título di e kansion Mi lenga folklor ya ta duna bo un indikashon kiko bo por spera di e komposishon di Ced Ride aki, na momentu ku bo haña oportunidat di skuch’é. Ya e video ta visibel riba retnan sosial. Un pabien na nos amigu Ced Ride ku e super produkshon aki. Danki na nòmber di Kòrsou hermano.