ARUBA.- Dia 14 di novèmber próksimo e popular komediante yu di Kòrsou, Edion Booy lo ta na Aruba pa presentá den e show ‘Mi Mundu di Ritmo i Lokura’ na Cas di Cultura.
Edion a keda invitá pa Angelique Stuger kende lo ta na kabes di un elenko ku lo presentá esenanan di komedia kompañá dor si su amigunan.
Angelique lo presentá entre otro músika ku e ta gusta, músika ku ta pone e mes hari, músika ku ta traha komo e mihó remedi pa felisidat. Lo tin show di baile, pasombra e ta gusta baila.
Pa Angelique ora bo pasa dushi i felis, mundu ta mas bunita. ‘Felisidat ta yena bo ku alegria i alegria ta hasi bo positivo i ora bo ta positivo bo ta wak e solo ta bria i bo ta smail, ora bo smail hende ta smail bek ku bo’.
Edion Booy lo aparesé den dos skèch ku lo keda presentá i lo tin 15 minüt di ‘Standup Comedy’ na su enkargo.
E show di músika i komedia ta keda presentá otro siman djamars den Cas di Cultura i lo kuminsá pa 8’or di anochi. Nos ta keda pendiente pa e presentashon di Edion Booy na Aruba.