WILLEMSTAD.- Obra nobo ku Pachi tei estrená djasabra awor na Teater Luna Blou (Zona Kultural). Un obra ku ta bai trese e realidat ku Kòrsou tin hopi chupadó.
Na trabou kaminda trahadónan ta chupa serka shèf, hiba trese, nan ta kima nan kolega, trahadónan ku ta bai kas di shèf bai hiba loke ta sosodé na trabou, kumpra ko’i smak hiba pa shèf, tambe tin shèfnan ku ta hasi mal uzo di nan poder, ami ta disidí i deshasí.
E obra ta trese tambe ku hopi biaha nèt esnan ku ta manda na trabou i abuzá, no por bisa nada na kas, anto ta bin baha nan frustrashon na trabou. E mensahe kla i raspa ku ta bini kada bes dilanti, abo ku ta hasi malu ku hende, kuidou ku lei di karma, tin un Dios riba bo kabes. Abo ku ta víktima, lag’é pa Dios.
Karchi ta optenibel na Pòmp di St. Maria, Luna Blou i Mensing’s Caminada.
Funshon: djasabra 9’or di anochi i djadumingu atardi, 4 pa 7’or. Hasi lihé buska bo karchi p’abo no keda afó.