WILLEMSTAD.- Den luna di mei 2018 e obra aki a keda presentá na vários okashon i pa djasabra awor lo bo tin e oportunidat di por mira ‘Mi yama sinta mira’ un biaha mas. E obra skibi i dirigí pa Roland ‘Pachi’ Damon ta keda presentá pa e elenko kustumbrá i ta relatá e situashon di tur hende ku ta hasi malu ku otro, hasi mal uso di nan poder i shèfnan ku loke nan bisa ta esei tin ku sosodé. Lei di karma ta bin bèk !. E komedia ta presentá e situashon di un tata ku ta hasi ko’i chambòn ku su kasá i yunan, un trahadó ku nan ta yam’é i bis’é ku su mama ta malu na hospital i e shèf no ta lag’é bai, bisando ku lo bo tende tòg kiko ta pasa ku bo mama. Poder ta relativo i bo mester tene kuido ora bo ta hasi malu ku hende. Karchinan ta optenibel na Teatro Luna Blou, Mensing’s Caminada, Pompstation Sta. Maria, Party City Curaçao i na Botika Tera Kora. Pa mas ku 1 karchi, por trese te kaminda bo ta, yama 524-3423, 696-2209 òf 685-3644.