WILLEMSTAD.- Djasabra awor dia 21  aprel, lo tin e último konsierto di Freewinds pa awor aki, promé ku nan bai Eastern Caribbean pa kasi 2 luna i mei. Honor  pa presentá den e konsierto aki ta pa Michele Henderson di Dominica, ku no mester ningun introdukshon.

Michele Henderson
Michele ta un artista original di e Isla di Dominica. E tin 5 álbum graba i tambe un DVD bibu, miéntras ku den pasado el a  yega di gana kòntèst di kansion di Karibe.
Ta trata aki di un kantante ku tur ku a mir’é kanta aki na Kòrsou sa ku ta trata aki di un tremendo kantante lokal ku te hasta a yega di kanta na papiamentu.
Na luna di yanüari  último Michele Henderson ya tabata den un konsierto riba Freewinds i a pone e públiko riba su pia ku su kansionnan, sigur Wow’i Kariño, original d Izaline Calister.
E konsierto aki lo ta unu solamente di Michele Henderson, kaminda e lo bai interpretá masha masha hopi kansion mes.

The Freewinds Band i NGN Brazz
Pa loke ta trata e parti di kompañamentu musikal, esaki lo ta na enkargo di The Freewinds Band, enkabesá pa maestro Franses Patrick  Zagury riba guitara, pero tambe Susan di Italia riba piano, John Politakis di Grecia riba drùms i Jeff di Inglatera riba bass. NGN Brazz ku tin mas ku 10 aña tokando huntu ku The Freewinds Band, tambe lo tei.

Entrada grátis
Manera a bira kustumber, entrada pa e konsierto nan ku Freewinds mes ta organisá ta grátis. E show e biaha aki ta un ora mas tempran i ta kuminsá eksaktamente 7 pm i p’esei nos ta pidi tur hende pa nan tei for di 6:30’or pa asina ei nan por subi i presensiá un tremendo show.
Pa bo keda registrá pa un o mas asiento den e show aki, manda un app na  +59995130837  i bisa kuantu lugá bo tin mester. Tur esnan ku den pasado a yega di bai e shownan riba Freewinds sa kon bon e ambiente aki sa ta. E number +59995130837 ta únikamente pa manda app.
Ta wikènt, sali ku e muchanan pa mira i disfrutá di un tremendo show. Kòrda registrá na tempu pa garantisá bo asiento. Un show ku Michele Henderson ta un garantia di kos bon.