WILLEMSTAD.-  Awe nochi lo tin e promé konsierto di aña riba Freewinds.  Honor pa presentá den e promé konsierto di aña aki ta pa Michele Henderson di Dominica i Kadir Snijder di Kòrsou. Dos kantante ku no mester ningun introdukshon.

Michele Henderson
Michele ta un artista original di e Isla di Dominica. E tin 5 álbum grabá i tambe un DVD bibu, miéntras ku den pasado el a  yega di gana kòntèst di kansion di Karibe.
Ta trata aki di un kantante ku tur ku a mir’é kanta aki na Kòrsou. Sa ku ta trata aki di un tremendo kantante lokal ku te hasta a yega di kanta na papiamentu.

Kadir Snijder
Kadir Snijder ta un kantante lokal ku un  bos poderoso. Hopi ta kompará su bos ku esun di  Luciano Pavarotti, mirando ku Kadir Snijder ta un tenor natural ku un bos potente.
Durante 2017 na diferente okashon Kadir Snijder a presentá riba Freewinds.

Entrada grátis
Manera a bira kustumber, entrada pa e konsierto nan ku Freewinds mes ta organisá ta grátis. E show ta kuminsá eksaktamente 8 pm i p’esei nos ta pidi tur hende pa nan tei for di 7:30 pa asina ei nan por subi i presensiá un tremendo show.
E barku Freewinds ta mará na Nieuwe Werf ku ta keda pasando na Panamá bai abou. Pa bo  keda registrá pa un o mas asiento den e show aki, manda un app na  +59995130837  i bisa kuantu lugá bo tin mester. Tur esnan ku den pasado a yega di bai e shownan riba Freewinds sa kon bon e ambiente aki sa ta.