KRALENDIJK -- Sindikatonan a logra hopi kos pa e trahadó, pero semper ta keda ku e gran poder pa fiha norma i regla, pero leinan semper ta den man di gobièrnu ku hopi biaha ta influensia pa esnan ku tin mas poder ekonómiko den un pais òf isla, segun miembro honorario i alabes konsehero di AFBW, Ewald Abdul

Abdul ta skirbi: “Sindikato ta un organisashon di trahadónan, debí ku trahadónan a bira hopi i te ainda imposibel pa kibra forsa di trahadónan i nan organisashon sin kai den diktadura manera a sosodé den hopi kaso den siglonan pasa.”

Industria òf kompania, uzando téknika, a yuda hende bai dilanti masha hopi mes, pero esei mes a trese kantidat di hende den problema, hamber i pobresa tabata kos di tur dia den kasnan di trahadónan, segun Abdul.

Pió ainda, di akuerdo ku Abdul, ya no ta nan mes ta doño di e loke nan a produsí, al kontrario nan ta produsí pa doño i ta haña un pago miserabel. Ta p’esei sindikatonan tei pa defendé derecho di e trahadónan i nan trabou pa trata na yega na un repartishon mas hustu di biennan ku e trahadónan mes ta produsí i buska pa mehorá kondishonnan di trabou, alabes progresá den nan trabou.

Komo ku nos leinan ku mester reglamentá, ta masha difísil pa por regla tur kos, sindikatonan a logra hopi kos pa e trahadónan, pero semper ta keda ku e gran poder pa fiha norma i regla, pero leinan semper ta den man di gobièrnu ku hopi bia ta influensia pa esnan ku tin mas poder ekonómiko den un pais òf isla, Abdul ta trese dilanti.

Abdul ta splika ku historia di sindikalismo aki na Boneiru tambe ta hopi importante, pa por siña nos, di e lucha di trahadónan, alabes nan organisashon pa derecho di trahadónan. Tin lidernan sindikal ku a bai sera den prisòn durante disturbio laboral den wèlga.

Pa tur loke a splika awor, ta resultá sin duda, ku sindikatonan no mester buska solamente derecho i interes di nan miembronan, pero tambe di e pueblo en general i mester tene kuenta ku un kantidat di otro faktornan den nos komunidat. Na Boneiru tin hopi pobresa, pasobra no tin un partisipashon hustu di tur loke naturalesa ta duna nos, segun Abdul.