WILLEMSTAD.- Mañan anochi tin e estreno di ‘Mijn (Bij) Vrouw – Biba Poligamia’ un obra skibí  pa Esther Duysker i dirigí pa Raymi Sambo.
Ku aktuashon di Raymi Sambo, Ritzah Statia i Sabrina van Halderen ‘Mijn (Bij) Vrouw’ ta un ‘thriller’ moralista tokante poligamia den sosiedat Karibense kaminda no ta straño ku hòmbernan tin baisait, pero asina mes e ta un tabú, no ta papia di dje.
E obra ta basá riba un historia real di Ulanda, den kua e señora kasá di e hòmber, ta adoptá yu di e baisait.  E muhé kasá aki no ta hunga e ròl di e kasá pasivo ku ta laga e hòmber hasi loke e ke, ounke e situashon a kous'é hopi doló.
‘Mijn (Bij)Vrouw’ ta trata e realidat universal di e poder destruktivo di amor i konsekuensianan di deseo i tristesa sin límite.

Base di e obra
E fasinashon di Raymi Sambo ku e tema di baisait ta bini di su propio famia. Su ruman muhé tabata un baisait. E ruman aki a fayesé algun aña pasá. Ounke dor di bèrgwensa nunka a papia di e relashon ku e hòmber kasá ei, te awe pareha di e ruman a keda un miembro respetá di famia.Pa komprondé e fenómeno aki mihó, Raymi Sambo a papia ku algun muhé antiano, surinameño i ulandes kasá ku un hòmber ku baisait. Kasi semper nan a haña nan mes den un relashon den tres sin ke pero ta aseptá komportashon di nan kasá. Apesar di nan tristesa na ta keda serka dje. Tin biaha pa amor, tin biaha pa motibunan ekonómiko. Raymi Sambo ke trese e frustrashon di e muhénan aki dilanti. No pa hasi nan héroe, pero pa mustra nan sufrimentu.

Presentashonnan na Kòrsou lo tuma lugá riba dianan 7,8 i 9 di desèmber na Floris Suite & Beach Club.

Theatergroep VIG / Raymi Sambo den pasado a presentá obranan manera ‘Aan Niets Overleden’ (2014), ‘Op zoek naar Oom Tom’ (2013) i HUID! (2010) ku hopi éksito.
For di aña 2003 Sambo i su grupo di teater VIG ta traha obranan ku ta trata e Ulanda kambiando tresiendo temanan 'pretu' ku ta tabú, na un manera ku apelashon universal. VIG su manera di traha ta para pa e aktor di koló ku ta aktua bai laga su koló.
Sambo su obranan ta enfoká riba e búskeda universal di identidat i outentisidat den e sosiedat interkultural di awe na Ulanda.